कोरोना भाइरसको दोस्रो लहरसँग जुधिरहेको नेपालमा सहयोग गर्न नेपाली दुतावास स्पेनले सक्रियता बढाएको छ । दुतावासले स्पेन सरकारलाई सहयोग गर्न औपचारिक रुपमा आग्रह गरिसकेको राजदुत दावाफुटी शेर्पाले जानकारी दिनुभयो । स्पेनको सरकारको तर्फबाट सहयोगको लागि कुटनीतिक रुपमा पहल भैहेको उहाँले बताउनुभयो । साथै दुतावासले स्पेनको सरकारी निकाय, संघसस्था र यहाँ स्थित नेपाली समुदायबाट सहयोग संकलन गरेर कसरी नेपालमा पठाउने भन्नेबारे बृहत छलफल गर्न शुक्रबार बिहान सर्बपक्षीय बैठक बोलाएको छ । जुम माफर्त हुने उक्त बैठकमा सहभागी भै आफ्ना सुझाव दिन स्पेन स्थित संघसस्थाका प्रतिनिधी र सवै नेपाली समुदायलाई दुतावासले आग्रह गरेको छ । यस्तै नेपालमा अत्याबश्यक अक्सिजन लगायत मेडिकल सामाग्री सहयोग गर्न एनआरएनए स्पेनले नेपाली समुदायसँग सहयोगको आब्हान गरेको छ । बिहिबार भएको संघको आकस्मिक बैठकले तत्काल सहयोग संकलन गरी नेपालमा अक्सिजन सिलिन्डर लगायतका सामाग्री पठाउने निर्णय गर्दै सहयोगको आब्हान गरेको हो । बैठकमा अध्यक्ष दिनेश गुरुङ्गले यसअघिका विभिन्न बिपतका समयमा जस्तै यसपटक पनि स्पेनबासी नेपाली समुदायले सहयोग गर्ने विश्वास ब्यक्त गर्नु भएको छ । उहाँले भोली शुक्रवार नै सहयोग संकलनका लागि बैक खाता निर्माण गरि सार्वजनिक गरिने बतनाउनुभयो । साथै संघले शुक्रवार नै सहयोग संकलनका लागि आब्हान र समन्वय गर्न स्पेन स्थित सवै संघसस्थाहरु समेतको बैठक आब्हान गरेको छ ।
आकस्मिक बैठकमा एनआरएनए युरोप उपसंयोजक मुक्त गुरुङ्गले नेपालमा अहिले तत्काल आबश्यक रहेको अक्सिजन सिलिन्डर पठाउनका लागि धेरै भन्दा धेरै आर्थिक संकलन गर्न आब्हान गर्नु भयो । एनआरएनए केन्द्रले ओमानबाट सिलिन्डर पठाएको भन्दै उहाँले स्पेनबाट पनि सहयोग संकलन गरेर जुन देशबाट पठाउन सहज र छिटो हुन्छ त्यसै गरी पठाउनुपर्ने सुझाब दिनुभयो । यस्तै आइसिसी सदस्य सुनिल रानाभाटले जति सक्दो छिटो सहयोग संकलन गरेर नेपालमा सहयोग पठाउनुपर्ने बिचार राख्नुभयो । एनआरएनए स्पेनका सदस्य शालिकराम डुम्रेले एनआरएनएले यसअघि कोभिड राहतको लागि उठाएको कोभिड खाताको रकम पनि अहिलेको सहयोग रकममा थपेर नेपालमा सहयोग गर्नुपर्ने बताउनुभयो । यसबारेमा बैठकममा सहभागीहरुको सहमती देखिएको छ । यस्तै बैठकमा उपाध्यक्ष उत्तरकुमार राईले आफुले स्पेन स्थित विभिन्न सरकारी निकाय र संघसंस्थासँग पनि सहयोगका लागि समयन्वय गरिरहेको र सकारात्मक जवाफ आएको जानकारी दिनुभयो । बैठकमा एनआरएनका संरक्षक अनिल गुरुङ्गले पनि आफुले विभिन्न पक्षसँग सहयोगको लागि पहल गरिरहेको भन्दै स्पेनबाटै सिलिन्डर नेपाल पठाउन असहज भए जुन देशबाट पठाउन छिटो र सहज हुन्छ त्यसै गर्नुपर्ने सुझाव दिनुभयो । नेपाली जनप्रगतीशिल मञ्चका युरोप महासचिव गंगा भुषालले नेपालमा अहिले आएको दुखद अबस्थामा अरु सवै कुरालाई बिर्सेर सहयोगका लागि लाग्न सबैजनालाई आग्रह गर्नुभयो ।
एनआरएनए क्षेत्रीय समिती कोस्टाब्लान्काका अध्यक्ष सुरेन्द्र भुजेल थापाले आफुहरुले त्यस क्षेत्रका सरकारी निकाय, संघसस्था र नेपाली समुदायसँग सहयोग उठाउन पहल शुरु गरेको जानकारी दिनुभयो । यस्तै क्षेत्रीय उपाध्यक्ष तुल्सी गुरुङ्ग, सचिव दीप श्रेष्ठ लगायतले पनि आआफ्नो क्षेत्रबाट सहयोग संकलनका लागि पहल गर्ने बताउनुभयो ।