स्पेनका विभिन्न पाँच वटा राज्य सरकारले सार्वजनिक गरेको नयाँ भ्याक्सिन क्यालेन्डर अनुसार ३० बर्ष देखि ४० बर्ष उमेर समुहलाई पनि जुनमै भ्याक्सिन शुरु हुने भएको छ । कातालोनिया, भ्यालेन्सिया, आन्डुलुसिया, कास्तिया ला मान्चा र एक्स्त्रेमादुराले ३० देखि ४० बर्ष उमेर समुहलाई पनि जुनमै भ्याक्सिन लगाउने गरी क्यालेन्डर सार्वजनिक गरेका छन भने अन्य ४ राज्यले पनि उक्त उमेर समुहलाई समेत समेटेर छिटै नयाँ क्यालेन्डर सार्वजनिक गर्ने स्पानिस संचारमाध्यमहरुले जनाएका छन् । स्पेनका प्राय सवै राज्यहरुमा जुनको पहिलो हप्ताबाट ४० बर्षमाथिलाई भ्याक्सिन लगाउन शुरु हुँदैछ भने कतिपयमा शुरु भैसकेको छ । ३० बर्षमाथिलाई भ्याक्सिन शुरु गर्ने सवैभन्दा पहिला सुचना निकाल्ने राज्य कास्तिया ला मान्चा हो । उक्त राज्यमा जुनको अन्तिम हप्ताबाट ३० देखि ४० बर्ष उमेर समुहका लाई पनि खोप दिइने छ । यस्तै भ्यालेन्सिया राज्यमा पनि जुनको १७ तारिकबाट उक्त उमेर समुहकालाई समेत भ्याक्सिन शुरु हुने जनाइएको छ । भ्यालेन्सिया सरकारले भ्याक्सिनका लागि सवैजनालाई स्थानीय स्वास्थ्य केन्द्रमा दर्ता भएर हेल्थ कार्ड लिन अनुरोध गरेको छ ।
कातालोनिया सरकारले ३ देखि ४ हप्तामा ३० देखि ४० बर्षमाथिका लागि खोप शुरु हुने जनाएको छ । त्यहाँ अहिले ४० देखि ५० बर्ष उमेर समुहकालाई भ्याक्सिन दिइरहेको छ । त्यसपछि १८ बर्षमाथिलाई समेत भ्याक्सिनको लागि फोन आउन सक्ने कातालोनियाका स्वास्थ्य अधिकारीले जनाएका छन् । यस्तै एक्स्त्रेमादुरा सरकारले पनि ३० देखि ४० बर्ष उमेर समुहकालाई पनि जुनमै भ्याक्सिन शुरु हुने बताएको छ । आन्डुलुसियिाले जुलाइको पहिलो हप्ताबाट उक्त समुहको भ्याक्सिन कार्य शुरु गर्ने जनाएको छ ।
स्पेनमा अहिलेसम्म २ करोड ६१ लाखले भ्याक्सिन लिइसकेका छन त्यसमा ८८ लाखले भ्याक्सिनको दुवै डोज लिइसकेका छन् । ६० बर्ष माथिका करिब ९५ प्रतिसत नागरिकले भ्याक्सिनको दुवै डोज लिइसकेको स्पेन सरकारले जनाएको छ । स्पेनले यो समरको अन्त्यसम्ममा ७५ प्रतिसत नागरिकलाई भ्याक्सिन लगाइसक्ने लक्ष्य राखेको छ ।