नेपाली दुतावास म्याड्रिडको आयोजनामा बिहिबार स्पेनको राजधानी म्याड्रिडमा नेपालको प्रर्यटन प्रबर्धन कार्यक्रम सम्पन्न भएको छ । दुतावासले नेपाल चिनाउने र नेपालमा जान स्पानिसहरुलाई प्रेरित गर्ने उद्देश्यले आयोजना गरेको “नेपाललाई नजिकबाट चिन्न बाँकी छ ” भन्ने कार्यक्रममा स्पेनका सरकारी तथा पर्यटन क्षेत्रमा काम गर्ने निकाय र नेपाली समुदायको सहभागिता रहेको थियो । म्याड्रिड स्थित क्यासिनो म्याड्रिडको हलमा भएको कार्यक्रममा नेपाललाई आफ्नो दोस्रो घर बताउने पर्वतारोही कार्लोस सोरियाले नेपाल आफ्नो जीवनकालमा एकपटक जानै पर्ने ठाँउ भएको भन्दै नेपालको पर्यटकीय क्षेत्रको बारेमा यर्थाथ र आफ्नो नेपाल अनुभव आदान प्रदान गर्नु भएको थियो । नेपालमा धान फल्ने भुमी देखि पृथ्वीको सवैभन्दा अग्लो चुचुरो भएको देश भन्दै नेपालमा पाइने विविध हावापानी मात्रै नभएर नेपालको संस्कृतीको बारेमा पनि धेरैले थाहा पाउनुपर्ने बताउनुभयो । नेपालमा धेरै जात, भाषा, धर्म मिलेर बसेको संस्कृती विश्वकै उदाहरणीय रहेको भन्दै त्यसको अनुभव गर्न नेपाल जानुपर्ने बताउनुभयो । उहाँले नेपालीहरुको पाहुनालाई स्वागत र सत्कार गर्ने परम्परा विश्वमै उत्कृट रहेको बताउनुभयो ।
कार्लोस सोरिया ८० बर्षको उमेरमा धौलागिरी हिमाल आरोहणको लागि हालै नेपाल पुग्नुभएको थियो र तर कोरोना माहामारीको कारण उहाँले आरोण स्थगित गरेर स्पेन फर्कनुभएको हो । उहाँले सगरमाथा देखि लिएर ८ हजार मिटरमाथिको धेरै हिमाल आरोहण गरिसक्नुभएको छ । कार्यक्रममा कार्लोसको टिमका फोटोग्राफर लुइस मिगेल, आरोही सितो कार्काभिला लगायतले नेपाल अनुभवको आदानप्रदान गर्दै नेपाल भ्रमण गर्नुपर्ने कारणहरुको बारेमा ब्याख्या गर्नु भएको थियो ।
देश निभेल पत्रिकाका डाइरेक्टर दारीयो रोद्रीगेथले सन्चालन गर्नुभएको कार्यक्रममा स्पेनका लागि नेपाली राजदुत दावाफुटी शेर्पाले नेपालको जातजाती, धर्म, सस्कृती र पर्यटकीय क्षेत्रको बारेमा भिडियो प्रस्तुत गर्दै सबैलाई नेपाल भ्रमण गर्न प्ररित गर्नु भएको थियो । उहाँले हालै नेपालमा कोरोना माहामारीसँग लड्नका लागि स्पेन सरकारले गरेको सहयोगका लागि स्पेन सरकार र स्पेनका नागरिकलाई धन्यवाद दिदै यो सहयोग निरन्तर रहने विश्वास ब्यक्त गर्नु भयो । यसक्रममा उहाँले नेपाल विभिन्न जाती, सस्कृती र धर्म मिलेर बसेको देश भएकोले विश्वलाई नै उदाहरणीय ठाँउ भएको भन्दै नेपालको विविधतापुर्ण संस्कृती र नेपालको प्राकृतिक सौन्र्दयता अवलोकनका लागि सवैलाई एकपटक नेपाल जान आग्रह गर्नु भयो । अहिले कोरोना माहामारीको कारणले केही समस्या भएपनि यो माहामारी छिटै सकिने र नेपालको पर्यटन क्षेत्रले समेत गति लिने उहाँले बताउनुभयो । यसको लागि स्पेनिस जनता र अरु सवैलाई नेपालप्रति सद्भाव राख्न उहाँले आग्रह गर्नुभयो ।
कार्यक्रममा स्पेनको सरकारी निकाय, पर्यटन क्षेत्रमा काम गर्ने विभिन्न क्षेत्रका प्रतिनिधी र स्पानिस तथा नेपाल समुदायका ब्यक्तिहरु सहभागी भएको र उक्त कार्यक्रमले नेपाललाई थप चिनाउन र नेपालको पर्यटन प्रबद्धनको लागि महत्वपुर्ण काम गरेको कार्यक्रममा सहभागी गैरआवासीय नेपाली संघ स्पेनका उपाध्यक्ष उत्तर राईले बताउनुभयो ।