गत मंसिरको पहिलो साता टर्कीबाट गैरकानूनी रुपमा युरोप प्रवेश गर्ने सिलसिलामा ग्रीसको सीमा नजिकै गाडी दुर्घटना हुँदा मृत्यु भएका ४ जनाको शव नेपाल लगिएको छ । दुर्घटनामा ज्यान गुमाएका भिमेश्वर नगरपालिका–६ दोलखाका राजु लामा र गौरीगंगा नगरपालिका–४ कैलालीका लक्ष्मण सापकोटाको शव गत बुधवार नेपाल लगिएको हो । आफन्तकाअनुसार सापकोटाको कैलाली र लामाको काठमाडौंको स्वयम्भूमा अन्त्येष्टि गरिएको छ । वैदेशिक रोजगार बोर्डले श्रमिक कल्याणकारी कोषको खर्चमा उनीहरुको शव फिर्ता ल्याएको हो।लामा र आचार्य टर्कीका लागि श्रम स्वीकृति लिएर गएका थिए। एउटै दुर्घटनामा ज्यान गुमाएका आमाछोदिङमो गाउँपालिका–३ रसुवाकी शर्मिला तामाङ भनिने रमिला घले र घिरिङ गाउँपालिका–५ तनहुँका ओम बहादुर थापाको भने शव भने एनआरएनको सहयोगमा शनिबार नेपाल लगिएको छ । घले र थापाले श्रम स्वीकृति नलिइ गएको भन्दै शव ल्याउन सरकारी निकायले तदरुकता नदेखाएपछि उनीहरुको शव गैरआवासीय नेपाली संघ (एनआरएनए) को सहयोगमा नेपाल लगिएको हो । संघका अनुसार अलपत्र परेका दुई नेपालीको शव ल्याउन संघले ७ हजार २ सय यूरो संकलन गरेर ग्रीस पठाएको छ ।
ग्रिसको शव ब्यबस्थापनको लागि एनआरएनए स्पेनले ३८ सय युरो सहयोग गरेको छ । एउटा शव नेपाल पुराउने रकम एनआरएनए स्पेनले जिम्मा लिएको छ । उक्त सहयोग अभियानमा ४ हजार सहयोग उठेको र बाँकी रकम कोषमै रहेको संघले जनाएको छ । एनआरएन स्पेनका अध्यक्ष सालिक राम डुम्रेले यस कार्यमा सहयोग गर्नु हुने क्षेत्रीय समितिहरु पाइस भास्को, कोस्टाब्लान्का, ग्रान कानारिया म्यड्रिड लगायत कार्यसमिति लगायत सम्पूर्ण सहयोगदाताहरुमा आभार प्रकट गर्नु भएको छ । यसैबिच उक्त सहयोग अभियानमा विश्व भरिबाट उठेको रकमबाट पोर्चुगलमा अंकित सिङ ठकुरीको शब नेपाल पठाउन १ हजार यूरो पठाइएको अध्यक्ष डुम्रेले जानकारी दिनुभयो ।