गैर आवासीय नेपाली संघ, स्पेनको आगामी कार्यकालका लागि हुने निर्वाचन अनललाइन भोटिङको माध्यमबाट हुने भएको छ । संघको आइतवार बसेको बैठकले स्पेनमा अहिले कोभिडको नयाँ लहर शुरु हुने खतरा रहेको र भौतिक रुपमै उपस्थित भएर मतदान गर्न सम्भव नहुने भएकोले अनलाइन भोटिङ गर्ने निर्णय गरेको प्रवक्ता सुन्दर रानाभाटले जानकारी दिनुभयो । संघले यसको जानकारी निर्वाचन समितीलाई गराउने र छिटै निर्वाचनको लागि सफ्टवेर किन्ने प्रक्रिया अगाडि बढ्ने उहाँले जानकारी दिनुभयो । अहिलेसम्म धेरै सफ्टवेर कम्पनीसँग कुराकानी भएको र सस्तो र विश्वसनीय कम्पनीको रुपमा अमेरिकाबाट नेपालीहरुले सञ्चालन गरिरहेको नेपाआइटी भन्ने कम्पनिले बनाएको सफ्टवेर लिने सम्भावना रहेको उहाँले बताउनुभयो । उहाँले छिटै सवै कम्पनिहरुको कोटेसन लिएर निर्णय गर्ने बताउनुभयो । नेपाआइटी कम्पनिले बनाएको उक्त सफ्टवेरले अहिलेसम्म ७ भन्दा धेरै निर्वाचन गराइसकेको र विश्वसनीयता पनि देखिएको उहाँले बताउनुभयो । उक्त कम्पनिका प्राबिधिकहरुसँग निर्वाचन समितीले बसेर डेमो हेरिसकेको छ । उक्त डेमो अनुसार पञ्जिकृत सदस्यहरुले आफ्नो सदस्या आवेदन गरेको इमेल आइडीमा भोटिङ लिंक प्राप्त गर्नेछन् । सोही लिंक मार्फत एक डिभाइसबाट एक भोट गर्न सकिने छ । उक्त सफ्टवेरमा कुनैपनि पदमा आवश्यक संख्या भन्दा धेरैलाई मतदान गर्न नमिल्ने बनाइएकोले बदर मत संख्या शुन्य हुने छ । यस्तै मतदान सकिएको १ घण्टा भित्र नतिजा आउने र मतदानको समयमा पनि खसेको भोटको प्रतिसत हेर्न मिल्ने उहाँले बताउनुभयो । उक्त सफ्टवेर स्पेनको २ हजार २० सदस्यको आधारमा ४ हजार युरो भन्दा कम मुल्यमा प्राप्त हुने उहाँले बताउनुभयो । संघको निर्वाचन यही जुलाई २६ तारिकमा हुने छ । संघको आगामी कार्यकालका लागि अध्यक्षमा उत्तरकुमार राई र शालिकराम डुम्रेबीच प्रतिस्पर्धा छ ।