गैर आवासीय नेपाली संघ, स्पेनको सोमबार भएको निर्वाचनमा नेपाली जनसम्पर्क समितीको तर्फबाट प्रतिधित्व गर्दै चुनावी मैदानमा उत्रीएका शालिकराम डुम्रे सहितको सवै प्यानल विजयी भएको छ । जम्मा २ हजार १९ मतदातामा १९ सय ४ मत खसेकोमा अध्यक्षमा डुम्रेले १ हजार १८ मत ल्याएर भने अर्का प्रतिस्पर्धी उत्तरकुमार राईले ८६३ मत पाए ।
आइसिसि सदस्यमा समावेशी प्यानलका दिनेश कुमार गिरी र जनसम्पर्क समितीको प्यानलका प्रकाश तिमिल्सेना विजयी भएका छन भने खुल्ला उपायक्षमा जनसम्पर्क समितीको प्यानलका सनु राउत र समावेशी प्यानलका कृष्णराम रानाभाट विजयी भएका छन् । बाँकी सवै पदहरुमा जनसम्पर्क समितीको प्यानलका उम्मेदवारहरु विजयी भएका छन् । पहिलोपटक अनलाइन मार्फत भएको एनआरएन स्पेनको निर्वाचनमा अहिलेसम्मकै धेरे मत खसेको थियो । अनलाइन भोटिङ्गको जिम्मा साइटल इलेक्सन टेक्नोलोजी एसएल कम्पनी बार्सिलोना लाई दिइएको थियो ।
त्यस्तै सचिव ग्रान कानारिया क्षेत्र दिप श्रेष्ठ, सचिव पाईस भास्को क्षेत्र दिपेन्द्र अर्याल, सहकोषाध्यक्ष शिब प्रसाद पौडेल, महिला संयोजक देवी कुमारी भण्डारी र सदस्यहरुमा ईमा सापकोटा भट्ट, जमुना देवी शर्मा, प्रकाश पुरी, कमल पराजुली र दिल बहादुर थापा निर्विरोध विजयी भएका थिए ।
नवनिर्वाचित अध्यक्ष शालिकराम डुम्रेले अब चुनावी प्रक्रिया सकिएकाले सवैलाई समेटेर अगाडी बढ्ने बताएका छन् । स्पेननेपालसँग प्रतिक्रिया दिदै डुम्रेले एनआरएनको बर्तमान कार्यसमितीको काम कारबाही स्पेनवासी नेपालीले चित्त नबुझाएकोले आफुहरुको सवै टिम विजयी भएको बताए । उनले अब यो प्रक्रियामा पराजित हुने पक्षलाई पनि समेटेर एनआरएन स्पेनलाई अघि बढाउने बताए । छिट्टै पदभार ग्रहण गरेपछि आफ्ना योजनाहरु अघि बढाउने उनले बताए । अध्यक्षका अर्का प्रतिस्पर्धी उत्तरकुमार राईले सामाजिक सञ्जाल माफर्त विजयी सवैलाई बधाई दिएका छन् ।